Bedam Shah Warsi
vo chale jhatak ke daman mire dast-e-na-tavan se
usi din ka aasra tha mujhe marg-e-na-gahan se
ye hijab-e-kufr-o-iman bhi hata do darmiyan se
ki maqam-e-qarb aage hai hudud-e-do-jahan se
miri tarah thak na jaaye kahin hasrat-e-fasurda
ki lipat ke chal to di hai vo ghubar karvan se
mujhe shauq se taghaful tira paemal kar de
mira sar utha na uthe tire sang astan se
tire mai-kada ka saaqi hai bayan bhi kaif agin
ki hava ko hai tavajud mire nudrat-e-bayan se
miri be-kasi ka aalam koi us ke ji se puchhe
miri tarah lut gaya ho bichhad ke karvan se
jo khayal men bhi chhute dar-e-pak tera mujh se
to lipat ke roiin mujh se tere sang astan se
tiri rahguzar tak ai jaan jo nasib ho rasai
malun ankhen apni naqsh-e-kaf-e-pa-e-sarban se
vahi gunjti hain ab tak mire kaan men sadaen
jo suna tha zamzama ik kabhi saz-e-kun-fakan se
na ho paas parda un ko ye parda-dariyan hon
miri dukh-bhari kahani jo sune miri zaban se
miri chashm-e-hasrat-agin ye kharabiyan na dekhe
jo qafas ko duur rakh de koi mere ashiyan se
mujhe khaak men mila kar miri khaak bhi uda de
tire naam par mita huun mujhe kya gharaz nishan se
isi khak-e-astan men kisi din fana bhi hoga
ki bana hua hai ‘bedam’ usi khak-e-astan se
Leave a Reply