ye dil bahut udaas hai thoḌa sa jhuuT bol
bhari paḌega sach abhi halka sa jhuuT bol
apni taraf se gaḌ.h koi achchhi si dastan
sach apne paas rakh koi achchha sa jhuuT bol
zeba hai teri chashm-e-siyah ko safed jhuuT
jhuTe kahin ke hasb-e-tamanna sa jhuuT bol
shirin suḳhan hai shirin bayani ka rakh bharam
ye bhi nahin kaha tha ki kaḌva sa jhuuT bol
tanha.iyon ki shaam hai dil Dubne ko hai
is jan-ba-lab mariz se thoḌa sa jhuuT bol
nashsha na toḌ mera guman ke nashe men huun
tu mujh pe mar-miTa hai bas itna sa jhuuT bol
Leave a Reply