Umr baDhti Ja Rahi Hai Zist ghaTti Jae Hai

Krishna Mohan

umr baḌhti ja rahi hai ziist ghaTti jaa.e hai

jism ki ḳhushbu ki ḳhvahish duur haTti jaa.e hai

soch men bhi ab nahin pahla sa tevar aur loch

shauq ki divar gard-e-gham se uThti jaa.e hai

be-maza hone lagi hai zindagi ba.ad-e-shabab

raat abhi baaqi hai lekin niind uchaTti jaa.e hai

aa rahi hai sukh milan ki champa.i ujli sahar

dukh ki ye bechain andheri rain kaTti jaa.e hai

yaas ke hassas lamhon men bhi hai kitna surur

shahida ummid ki mujh se lipaTti jaa.e hai

kaam ki ifrat men daftar ke hangamon men bhi

teri yaad aa.e tavajjoh meri baTti jaa.e hai

hai badan chuur aur komal kis qadar chit-chor shaam

jaise sharmili dulhan ḳhud men simaTti jaa.e hai

hai vo chanchal kamani mahbub saare shahr ko

dekh kar jis ko nazar meri palaTti jaa.e hai

bab-e-hasrat dastan-e-shauq tasvir-e-umid

lamha lamha zindagi auraq ulaTti jaa.e hai

jaag uThi hai jiv-jyoti aas aur vishvas ki

‘krishn-mohan’ kalima dubidha ki chhaTti jaa.e hai