kisi ke dida-e-tar ko nazar men rakhte hain
safar men ḳhud ko magar dil ko ghar men rakhte hain
palaTna paḌta hai har shaam un parindon ko
na jaane kaun si shai ko shajar men rakhte hain
khuli fazaon ki vus.at vo kaise samjhenge
jo qaid ḳhvab ko divar-o-dar men rakhte hain
pukarte hain unhen un ke ghar ke sannaTe
vo apne-ap ko kyuun rahguzar men rakhte hain
ḳhulus rakhte hain lekin jhuka nahin karte
ana ka rang bhi thoḌa hunar men rakhte hain
Leave a Reply