mujh par nishan laga.iye pahle savaliye
phir mas.alon ko kholiye aur hal nikaliye
jazbat aa sake hain kabhi iḳhtiyar men
ankhon ki fikr chhoḌiye dil ko sambhaliye
vahshat ne meri niind pe pahre laga diye
kuchh ḳhvab meri aankh ki janib uchhaliye
vahm-o-guman utaar ke phenke hain aur phir
ham ne yaqin ki uun se ḳhirqe sila liye
kam paḌ raha tha pahle hi kashkol-e-zindagi
aur ham ne apni zaat ke gham bhi uTha liye
kuchh log gaanv chhoḌ ke shahron men ja base
baaqi ko intizar ki dimak ne kha liye
‘faisal’ vo phir bhi aankh pe zahir nahin hua
parde bhi darmiyan se saare uTha liye
Leave a Reply