Har Jalwe Pe Nigah Kiye Ja Raha Hun Main

Anand Narayan Mulla

har jalve pe nigah kiye ja raha huun main

ankhon ko ḳhizr-e-rah kiye ja raha huun main

miTne na paa.e tazgi-e-lazzat-e-gunah

tauba bhi gaah gaah kiye ja raha huun main

kaisi ye zindagi hai ki phir bhi hai shauq-e-zist

gauhar-nafas ik aah kiye ja raha huun main

ashkon ki mash.alon ko farozan kiye hue

tai iltija ki raah kiye ja raha huun main

ḳhud jis ke samne siper-andaḳhta hai husn

aisi bhi ik nigah kiye ja raha huun main

shayad kabhi vo bhuul ke rakkhen idhar qadam

ankhon ko farsh-e-rah kiye ja raha huun main

baḌhti hi ja rahi hain tiri kam-nigahiyan

kya dil men tere raah kiye ja raha huun main

zulmat-e-dair-o-ka.aba men kuchh raushni si hai

shayad koi gunah kiye ja raha huun main

‘mulla’ har ek taaza musibat pe hans ke aur

kaj gosha-e-kulah kiye ja raha huun main