kashti-e-dil nazr-e-tufan ho ga.i
ek mushkil aur asan ho ga.i
sub.h-dam shabnam ko jaane kya hua
sohbat-e-gul se gurezan ho ga.i
us nazar ki sadgi to dekhiye
jo tire jalvon pe qurban ho ga.i
phuul ko hairat-zada sa dekh kar
har kali gulshan men hairan ho ga.i
mere pahlu se vo uTh kar kya ga.e
dil ki duniya saḳht viran ho ga.i
dil ki paiham be-qarari ke nisar
baḌhte baḌhte afat-e-jan ho ga.i
dekh kar meri pareshani ko ‘arsh’
zindagi ḳhud bhi pareshan ho ga.i
Leave a Reply