Kuchh Din Guzre Aali-Sahib Aali-Ji Kahlate The

Jameeluddin Aali

kuchh din guzre ‘ali’-sahib ali-ji kahlate the

mahfil mahfil qarya qarya sher sunate jaate the

qadr-e-suḳhan ham kya janen haan rang-e-suḳhan kuchh aisa tha

achchhe achchhe kahne vaale apne paas biThate the

ghazlon men sau rang mila kar apna rang ubhara tha

ustadon ke saa.e men kuchh apni raah banate the

giton men kuchh aur na ho ik kaifiyat si rahti thi

jab bhi misre raqsan hote ma.ani saaz bajate the

dohe kahne aur paḌhne ka aisa tarz nikala tha

sunne vaale sar dhunte the aur pahron paḌhvate the

samne baiThi sundar naren aap talab ban jaati thiin

pardon men se farma.ish ke sau sau parche aate the

”ghazlen dohe git” ki shohrat mulk se bahar phaili thi

hindostan se aane vaale tohfon men le jaate the

ahl-e-hunar ki ḳhosha-chini un ko vaj.h-e-sa.adat thi

be-hunaron men apni ana ka parcham bhi lahrate the

phir dekha ki bachcha bachcha hansta tha aur ‘ali’-ji

farden likhte maslen paḌhte baiThe gilD chalate the