Poet
na kaho e’tibar hai kis ka
bevafai shiar hai kis ka
ai ajal sham-e-hijr aa pahunchi
ab tujhe intizar hai kis ka
ishq se main khabar nahin ya rab
dagh-e-dil yadgar hai kis ka
dil jo zalim nahin tiri jagir
to ye ujda dayar hai kis ka
mohtasib puchh mai-paraston se
naam amarz-gar hai kis ka
bazm men vo nahin uthate aankh
dekhna nagavar hai kis ka
pahne phirta hai matami poshak
asman sogvar hai kis ka
chain se so raho gale lag kar
shauq be-ikhtiyar hai kis ka
aap sa sab ko vo samajhte hain
mo’tabar inkisar hai kis ka
yaar ke bas men hai ummid-e-visal
yaar par ikhtiyar hai kis ka
aap ‘bimar’ ham hue rusva
sar-nigun razdar hai kis ka
Leave a Reply