Saghar Nizami
na kashti hai na fikr-e-na-ḳhuda hai
dil-e-tufan-talab ka aasra hai
ilahi ḳhair namus-e-vafa ki
unhen bhi fikr-e-namus-e-vafa hai
subuk-saran-e-sahil jante hain
dil-e-sahil men kya tufan bapa hai
nahin ye naghma-e-shor-e-salasil
bahar-e-nau ke qadmon ki sada hai
farogh-e-mah kya aur kahkashan kya
ye mere mah-e-nau ki ḳhak-e-pa hai
zamane ki ghulami ham-nafas kyuun
zamana aadmi ki ḳhak-e-pa hai
shikayat-ha-e-soz-e-tishnagi kyuun
abhi ‘saghar’ dar-e-mai-ḳhana-va hai
Leave a Reply