Parveen Fana Syed
ujda hua shahr phir basaun
ye hausla ab kahan se laun
tuute hue aaine men khud ko
main dekh jo luun to dar na jaun
zakhmon se bhare chaman men rah kar
phulon se mahakte giit gaun
ai kaash vafa ki raushni se
ummid ka ik diya jalaun
tajdid-e-vafa ke asare par
zakhmon ki chubhan bhi bhuul jaun
apna hi lahu ravish ravish par
ai mere chaman kise dikhaun
Leave a Reply