Shakeel Azmi
raaz men rakh tiri rusva.i ka qissa main huun
mujh ko pahchan tira dusra chehra main huun
dafan hain tere ka.i raaz mire siine men
jo tire ghar se guzarta hai vo rasta main huun
muddaton ba.ad bhi jaari hai azabon ka safar
qatra qatra tiri ankhon se Tapakta main huun
aa zara baiTh mire paas bhi kuchh pul ke liye
mere hamdam tiri divar ka saaya main huun
ab bhi zinda huun tiri ruuh men gham ki surat
kaun kahta hai ki TuuTa hua rishta main huun
mujh ko pujegi tah-e-ḳhak jo duniya hai ‘shakil’
kal jo TuuTa tha falak se vo sitara main huun
Leave a Reply