Parveen Kaif
koi kisi ki tarah hai koi kisi ki tarah
bas ek aap ka jalva hai aap hi ki tarah
simaT ke gham ke andhere men log baiTh ga.e
magar hamen to bikharna tha raushni ki tarah
ye mere ḳhvab ki jannat ye chand ka angan
yahan to dhuup bhi lagti hai chandni ki tarah
nazar men shakl tiri sub.h-e-aftab-e-azal
zaban pe naam tira harf-e-aḳhiri ki tarah
ham un ḳhudaon se jhuk kar nahin mila karte
jo aadmi se na milte hon aadmi ki tarah
vo dard dushman-e-jan kaise ban gaya ‘parvin’
jise aziiz rakha ham ne zindagi ki tarah
Leave a Reply