kaha jo main ne ki yusuf ko ye hijab na tha
to hans ke bole vo munh qabil-e-naqab na tha
shab-e-visal bhi vo shokh be-hijab na tha
naqab ulat ke bhi dekha to be-naqab na tha
lipat ke chuum liya munh mita diya un ka
nahin ka un ke siva is ke kuchh javab na tha
mire janaze pe ab aate sharm aati hai
halal karne ko baithe the jab hijab na tha
nasib jaag uthe so gae jo paanv mire
tumhare kuche se behtar maqam-e-khvab na tha
ghazab kiya ki ise tu ne mohtasib toda
are ye dil tha mira shisha-e-sharab na tha
zamana vasl men leta hai karvaten kya kya
firaq-e-yar ke din ek inqalab na tha
tumhin ne qatl kiya hai mujhe jo tante ho
akele the malak-ul-maut ham-rikab na tha
dua-e-tauba bhi ham ne padhi to mai pi kar
maza hi ham ko kisi shai ka be-sharab na tha
main ru-e-yar ka mushtaq ho ke aaya tha
tire jamal ka shaida to ai naqab na tha
bayan ki jo shab-e-gham ki bekasi to kaha
jigar men dard na tha dil men iztirab na tha
vo baithe baithe jo de baithe qatl-e-am ka hukm
hansi thi un ki kisi par koi itaab na tha
jo laash bheji thi qasid ki bhejte khat bhi
rasid vo to mire khat ki thi javab na tha
surur-e-qatl se thi haath paanv ko jumbish
vo mujh pe vajd ka aalam tha iztirab na tha
sabat bahr-e-jahan men nahin kisi ko ‘amir’
idhar numud hua aur udhar hubab na tha
Leave a Reply