lagi hai misi paan khaae hue hain
sunane pe beda uthae hue hain
ghazab hai hasinon se dil ka lagana
ye aafat ke putle banae hue hain
mire khat ko phada raqibon ke aage
kisi ki vo patti padhae hue hain
ulajhne se balon ke bigdo na sahib
tumhare hi ye sar chadhae hue hain
kaleja hatheli pe rakh luun to jaun
vo hathon men mehndi lagae hue hain
shab-e-hijr jab khvab dekha ye dekha
ki tujh ko gale se lagae hue hain
tiri tegh ki aab jaati rahi hai
mire zakhm paani churae hue hain
jidhar dekhta huun unhen ka hai jalva
vo nazron men aise samae hue hain
utarenge kis kis ko nazron se ‘anjum’
vo kyuun aaj tevari chadhae hue hain