Main KHud Apna Lahu Pine Laga Hun

maiñ ḳhud apnā lahū piine lagā huuñ

kahāñ paanī kisī se māñgtā huuñ

ye duniyā aag hai ik aag jis meñ

maiñ ḳhud ko jhoñk denā chāhtā huuñ

tirī ḳhāmoshiyoñ ke panchhiyoñ ko

maiñ āvāzoñ ke daane bāñTtā huuñ

akele-pan ke bīhaḌ jañgaloñ meñ

tumhārā naam le kar chīḳhtā huuñ

lahaktī aag ke tannūr meñ ab

tumhārī yaad zinda jhoñktā huuñ

maiñ apne-āp se nārāz huuñ ab

so apne aap ko kam Toktā huuñ

Leave a Comment