main ḳhud apna lahu piine laga huun
kahan paani kisi se mangta huun
ye duniya aag hai ik aag jis men
main ḳhud ko jhonk dena chahta huun
tiri ḳhamoshiyon ke panchhiyon ko
main avazon ke daane banTta huun
akele-pan ke bihaḌ jangalon men
tumhara naam le kar chiḳhta huun
lahakti aag ke tannur men ab
tumhari yaad zinda jhonkta huun
main apne-ap se naraz huun ab
so apne aap ko kam Tokta huun
Leave a Reply