Hafeez Hoshiarpuri
aisi bhi kya jaldi pyare jaane milen phir ya na milen ham
kaun kahega phir ye fasana baiTh bhi jaao sun lo koi dam
vasl ki shirini men pinhan hijr ki talḳhi bhi hai kam kam
tum se milne ki bhi ḳhushi hai tum se juda hone ka bhi gham
husn-o-ishq juda hote hain jaane kya tufan uThega
husn ki ankhen bhi hain pur-nam ishq ki ankhen bhi hain pur-nam
meri vafa to nadani thi tum ne magar ye kya Thani thi
kaash na karte mujh se mohabbat kaash na hota dil ka ye aalam
parvane ki ḳhaak pareshan sham.a ki lau bhi larzan larzan
mahfil ki mahfil hai viran kaun kare ab kis ka matam
kuchh bhi ho par in ankhon ne akasr ye aalam bhi dekha
ishq ki duniya naz-e-sarapa husn ki duniya ijz-e-mujassam
shahd-shikan honTon ki larzish ishrat baaqi ka gahvara
da.era-e-imkan-e-tamanna narm lachakti banhon ke ḳham
apne apne dil ke hathon donon hi barbad hue hain
main huun aur vafa ka rona vo hain aur jafa ka matam
nakami si nakami hai mahrumi si mahrumi hai
dil ka manana sa.i-e-musalsal un ko bhulana koshish-e-paiham
ahd-e-vafa hai aur bhi mohkam teri juda.i ke main qurban
teri juda.i ke main qurban ahd-e-vafa hai aur bhi mohkam
Leave a Reply