Poet
chal diye ham ai gham-e-alam vida.a
shor-e-matam ta-kuja matam vida.a
jaate hi tere har ik ka kuuch hai
jaan vida.a o dil vida.a o dam vida.a
roz-e-mayyat bhi nahin kam iid se
pahle rehlat se hua har gham vida.a
hai qayamat ek din us ka qayam
dil ko kar ai turra-e-ḳhush-ḳham vida.a
us ka rasta ku-e-ghair aur apna ḳhuld
vo udhar ruḳhsat idhar hain ham vida.a
ghair ki ḳhatir hai to jaane bhi do
kijiye us ko ḳhush-o-ḳhurram vida.a
haa.e re umr-e-ravan ka qafila
har qadam har aan hai har dam vida.a
kyuun na hon aghosh-e-hasrat sub.h-o-sham
roz-o-shab aalam se hai aalam vida.a
hai ba-qadr-e-hausla yaan ittifaq
jaam se hargiz na hoga jam vida.a
sun chuka huun main tira azm-e-safar
aankh se meri na hoga nam vida.a
hasrat-e-be-iḳhtiyari dekhna
tan se jaan hoti hai kya tham tham vida.a
ab kahan sabr-o-qarar-o-tab-o-hosh
saath hi is ke hue paiham vida.a
la ta.ayyun be nishani ne kiya
kijiye aram ruḳhsat ram vida.a
mohlat-e-rang-e-chaman ḳhuun kyuun na ho
ho ga.i jab fursat-e-shabnam vida.a
ai ‘qalaq’ chaliye ki manzil duur hai
ho rahenge yaar sab baham vida.a
Leave a Reply