Syed Sarosh Asif
main ḳhud apni ghazlen aksar paḌhta huun hairani se
kaise pechida baten kah leta huun asani se
jis ghar men bachche hote hain us ghar se rahti hai duur
virani ko Dar lagta hai bachchon ki shaitani se
peḌ bhi angan se kaTvaya aur munDer pe kanch jaḌe
mushkil se azad hua huun chiḌiyon ki nigarani se
dard ghanera hijr ka sahra ghor andhera aur yaden
raam nikal ye saare ravan meri raam kahani se
tar ankhen sahil par rakh kar kaan laga kar sunta huun
gahra paani kya kahta hai mil kar uthle paani se
yaad duaon men rakhoge rasman kah to dete ho
kis ne kis ko yaad kiya hai rasmi yad-dahani se
Leave a Reply