poet

Kya Kahen Mahfil Se Teri Kya Utha Kar Le Gae

kya kahen mahfil se teri kya utha kar le gae

ham mata-e-dard ko tanha utha kar le gae

dhuup ka sahra nazar aata hai ab charon taraf

aap to har ped ka saaya utha kar le gae

is bhari duniya men ab to koi bhi apna nahin

jaise tum har dard ka rishta utha kar le gae

qatre qatre ko taraste hain vo ab ahl-e-havas

jo kabhi dharti se har dariya utha kar le gae

ab vahi zarre hamare haal par hain khanda-zan

asman tak jin ko ham uncha utha kar le gae

kya gharaz ham ko vahan ab koi bhi abad ho

ham to us basti se ghar apna utha kar le gae

vo to majnun tha raha jo umar bhar sahra-navard

ham jahan pahunche vahin sahra utha kar le gae

kar na paae rahbar bhi rahnumai jab ‘hayat’

ham bhi hairani men naqsh-e-pa utha kar le gae

More Poems

Leave a Comment