Dilawar Ali Aazar
zamin apne hi mehvar se haT rahi hogi
vo din bhi duur nahin ziist chhaT rahi hogi
baḌha raha hai ye ehsas meri dhaḌkan ko
ghaḌi men suui ki raftar ghaT rahi hogi
main jaan lunga ki ab saans ghuTne vaala hai
hare daraḳht se jab shaḳh kaT rahi hogi
na.e safar pe ravana kiya gaya hai tumhen
tumhare paanv se dharti lipaT rahi hogi
ghalat kaha tha kisi ne ye gaanv valon se
chalo ki shahr men ḳhairat baT rahi hogi
falak ki samt uchhali thi jal-pari main ne
sitare haath men le kar palaT rahi hogi
badan men phail rahi hai ye ka.enat ‘azar’
hamari aankh ki putli simaT rahi hogi
Leave a Reply