pas-e-nazzara koi lahr si thi paani tak
kya tamasha tha na thi aankh men hairani tak
safar itna tha kaThin lauT bil-aḳhir aa.e
baḌi mushkil se chale rah-e-tan-asani tak
dhajjiyan jism se utri hain abhi ḳhair manao
tan se utrega yahan jama-e-uryani tak
kisi anjan chamak ke hain dil-o-chashm asiir
silsila ek sa hai aa.ine se paani tak
sar-o-saman koi us raah se kyunkar le jaa.e
chhoḌ aa.e hain jahan be-sar-o-samani tak
aur phir itna chale paanv men taqat na rahi
do qadam the miri dana.i se nadani tak
Leave a Reply