Fikr Mein Muft Umr Khona Hai

fikr meñ muft umr khonā hai

ho chukā hai jo kuchh ki honā hai

khel sab chhoḌ khel apnā khel

aap qudrat kā tū khilaunā hai

aañkh Tuk khol dīd-e-qudarat kar

phir to paañv pasār sonā hai

chup rahā kar baḌoñ kī majlis meñ

ye bhī ek āfiyat kā konā hai

merā ma.ashūq hai mazoñ meñ bharā

kabhū mīThā kabhū salonā hai

chhal-bal us kī nigāh kā mat pūchh

sehr hai ToTkā hai Tonā hai

ro tū ‘hātim’ ‘husain’ ke ġham meñ

aur ronā to raañD ronā hai

Leave a Comment