main pa saka na kabhi is ḳhalish se chhuTkara
vo mujh se jiit bhi sakta tha jaane kyuun haara
baras ke khul ga.e aansu nithar ga.i hai faza
chamak raha hai sar-e-sham dard ka taara
kisi ki aankh se Tapka tha ik amanat hai
miri hatheli pe rakkha hua ye angara
jo par sameTe to ik shaḳh bhi nahin paa.i
khule the par to mira asman tha saara
vo saanp chhoḌ de Dasna ye main bhi kahta huun
magar na chhoḌenge log us ko gar na phunkara
Leave a Reply