Hairan Si Hai Bhachak Rahi Hai

Poet

hairan si hai bhachak rahi hai

nargis kis gul ko tak rahi hai

aa.i hai bahar ghunche chaTke

kya phulon ki bu mahak rahi hai

mai-ḳhane pe menh baras raha hai

bijli kaisi chamak rahi hai

baaqi hai asar abhi junun ka

sauda to gaya hai jhak rahi hai

puchho na jalan ka dil ke ahval

ik aag paḌi dahak rahi hai

nargis ko to aankh uTha ke dekho

kis yaas se tum ko tak rahi hai

laila majnun ka raTti hai naam

divani hui hai bak rahi hai

paigham-e-bahar aan pahuncha

bulbul kya kya chahak rahi hai

mizhgan ka jo dil men hai tasavvur

ik phans paḌi khaTak rahi hai

ho ja.ega raam rafta rafta

vahshat to miTi jhijak rahi hai

baaqi jo ye jan-e-na-tavan hai

kya zindon men hai sisak rahi hai

aane ki tire hi muntazir hai

o maut kahan tu thak rahi hai

kya shoḳh hai vo sunahri rangat

kandan ki tarah damak rahi hai

ru-e-rangin araq-fishan hai

shabnam gul se Tapak rahi hai

ham ‘rind’ hain bazm apni kis raat

be-jam-e-mai o gazak rahi hai