Kausar Siddiqi
be-hijabana kabhi davat-e-didar bhi de
lazzat-e-ishq bhi de ishq ka azar bhi de
masnad-e-ilm-o-adab par mutamakkin farma
naghma-o-sher bhi de ḳhama-e-gul-kar bhi de
taq-e-har-bazm men rakh sham.a bana kar mujh ko
aur parvana-sifat lazzat-e-azar bhi de
gul ki manind ḳhamoshi ke bhi adab sikha
aur bulbul ki tarah shoḳhi-e-guftar bhi de
toḌ de gahe-ba-gahe miri hasti ka ḳhumar
dil jo garma de kabhi vo mai-e-gulnar bhi de
kohsaron men phirun gaah chaman men bhi rahun
dasht-e-pur-ḳhar bhi de gulshan-e-be-ḳhar bhi de
main huun gar ghuncha to gulshan men khila de mujh ko
mast kar de jo zamane ko vo mahkar bhi de
daulat-e-faqr bhi de aur shahanshahi bhi
barg-e-gul de mire hathon men to talvar bhi de
husn-e-fitrat ke ḳhazanon ko luTa de mujh par
zor-e-tahrir bhi de ḳhama-e-gul-kar bhi de
Leave a Reply