Shakeel Badayuni
jada-e-ishq men gir gir ke sambhalte rahna
paanv jal jaaen magar aag pe chalte rahna
jalva-e-amn tumhin se hai mohabbat vaalo
mahr-e-taban ki tarah roz nikalte rahna
naghma-e-ishq na ho ek hi dhun par qaaim
vaqt ke saath zara raag badalte rahna
zindagi ko mah-o-anjum na ujala denge
tum na in jhute khilaunon se bahalte rahna
hai yahi vaqt-e-amal johd-e-musalsal ki qasam
be-saharon ki tarah haath na malte rahna
zindagani hai faqat garmi-e-raftar ka naam
manzilen saath liye raah pe chalte rahna
hai sitaron ki tarah mail-e-parvaz ‘shakil’
dushmano tum ko qasam hai yunhi jalte rahna
Leave a Reply