rahe hai aaj kal kuchh is tarah charḳh-e-kuhan bigḌa
mare hi ashiyan se jaise ye nazm-e-chaman bigḌa
kahan guzri hai saari raat kuchh ham bhi sunen aḳhir
ye ruḳh ye chandni chhiTki ye tar-e-pairahan bigḌa
baras kar rah ga.iin kaliyan chaman ke farsh-e-rangin par
pakaḌ kar shaḳh jab kal shaam vo ghuncha-dahan bigḌa
tiri nazron hi tak tha sab saliqa ahl-e-mahfil ka
tire uThte hi jan-e-husn rang-e-anjuman bigḌa
kise aata tha jiina is se pahle teri duniya men
sanvara hai mohabbat ne mazaq-e-ruh-o-tan bigḌa
gila tha bevafa.i ka hamen par un se kya kahiye
vo kahte hain ki hai kuchh in dinon tera chalan bigḌa
Leave a Reply