mizhgan ne roka ankhon men dam intizar se
uljhe hain khaar daman-e-bad-e-bahar se
matlab khizan se hai na gharaz hai bahar se
ham dil utha chuke chaman-e-rozgar se
ye gul khila na lala-rukhon ke firaq men
ham daagh le chale chaman-e-rozgar se
bismil jo hain to ham hain tadapte jo hain to ham
vo khush hain said-gah men sair-e-shikar se
aghaz-e-ishq hai vo badhate hain rasm-o-rah
ham dil men khauf karte hain anjam-e-kar se
un ko hua jo nashsha-e-mai meri ban padi
parda khula na daman-e-mauj-e-khumar se
kalkatta se bhi kijiye hasil koi to ilm
sikhenge sehr-e-samri ham chashm-e-yar se
ai ‘mehr’ ye ghazal vo pur-ejaz-o-garm hai
‘atish’ agar sune nikal aae mazar se