hua hai zer-e-zamin asman ajiib sa kuchh
main jis men rahta huun vo hai makan ajiib sa kuchh
falak se aata hai ruq.a hamare hone ka
hai apne mathe pe raushan nishan ajiib sa kuchh
kahan ka vasl bhala aur kahan ki hasrat-e-vasl
har ek lamha hua be-aman ajiib sa kuchh
ana ki jis se thi ummid vo hai nang-e-ana
jise tha hona vahi hai yahan ajiib sa kuchh
kahan main hota huun amada kahne sunne par
lahu se meri ragon men ravan ajiib sa kuchh
main jabr apni tabi.at pe jab bhi karta huun
dikha.i deta hai mujh ko jahan ajiib sa kuchh
hai tere sheron men kuchh aisi ḳhush-gumani ‘tur’
bayan-e-husn hai husn-e-bayan ajiib sa kuchh
Leave a Reply