dekhe to tamaddun ka banna koi urdu men
begana mizajon ki hai dosti urdu men
alfaz na.e Dhale kya kya na.i urdu men
raa.ij mutabadil hain jin ke ka.i urdu men
hai qaid ilaqe ki maz.hab ki na millat ki
milte hain dil-o-jan ke rishte ka.i urdu men
zholida-bayan vo hain pechida zaban un ki
ik shart safa.i ki bas rah ga.i urdu men
hai tarjume ke bal par ye dam-zaban-dani
ik kavish-e-be-danish phir phans ga.i urdu men
ab shayad isi surat kuchh baat bane un ki
sochi thi jo english men tahrir ki urdu men
ye un ki nigarish hai ya dusron ki utran
ye saari baḌi baten hain kaun si urdu men
dekhi jo miri uchkan vo shoḳh pukar uTTha
jachne lage sarkar ab apni na.i urdu men
kya ḳhuub hi jachti hai in mashriqi kapḌon men
angrezi men ye kya thi kya ho ga.i urdu men
shikva na shikayat hai pechida bayani ki
kyuun talḳh ye lahja hai kahiye bha.i urdu men
Leave a Reply