kya gul khila.e dekhiye tapti hui hava
masmum ho ga.i hai mahakti hui hava
ye chithaḌon men phuul ye sargarm-e-kar log
ye dopahar ki dhuup ye jalti hui hava
zinda vahi rahega jise ho shu.ur-e-zist
kahti hai roz rang badalti hui hava
badal ghire to aur bhi shoa.la-fishan hui
phulon ki pattiyon ko jhulasti hui hava
tufan-e-gard-o-bad se sanvla na jaa.en log
phir ruk ga.i hai shahr men chalti hui hava
kumhla na jaa.e gulshan-e-sham-o-sahar ‘hazin’
muddat se chal rahi hai sulagti hui hava
Leave a Reply