duniya ko har chiiz dikha.i ja sakti hai
patthar men bhi aankh bana.i ja sakti hai
dil ki miTTi ki zarḳhezi aisi hai ki
kaisi bhi ho chiiz ugaa.i ja sakti hai
hijr ka mausam vo mausam hai jis men janan
ankhon men bhi raat bita.i ja sakti hai
patthar ko Thokar ki had tak tum na jaano
patthar se to aag laga.i ja sakti hai
ḳhud ke hone ka ehsas dilata hai vo
is Dar se ke us ki ḳhuda.i ja sakti hai
dil ki baazi aisi baazi hai jis men ham
haren bhi to jiit mana.i ja sakti hai
mujh ko saare naqsh adhure dikhte hain ab
ya.ani mujh pe gaaj gira.i ja sakti hai
Leave a Reply