ghabra.iye kyuun zindagi be-kaif agar hai
aḳhir shab-e-tarik ka anjam sahar hai
vo shaam ki surat hai na vo rang-e-sahar hai
kis kaukab-e-manhus ka yarab ye asar hai
afsana-e-gham sina-e-bulbul men hai fariyad
auraq-e-gul-e-tar men ba-unvan-e-digar hai
be-dard hai insan to hain sab is ke hunar aib
hai dil men agar dard to har aib hunar hai
sabit hai ba-har-taur gham-e-ishq ram-e-husn
aram ko puchho to idhar hai na udhar hai
masnua ko san.e.a se juda kar nahin sakta
a.ine men aks-e-hunar-e-a.ina-gar hai
roti hui ankhon men hai gharqab tabassum
punjab hai dehli men jo ab rahguzar hai
phulon men tira rang hai kanTon men tiri nok
ye husn tira hai ki mira husn-e-nazar hai
‘mahrum’ magar ishq tumhara hai riya.i
fariyad men tasir na aahon men asar hai
Leave a Reply