jiine ka kuchh usuul na marne ka Dhang hai
har chhoTi-chhoTi baat pe aapas men jang hai
jab se suna hai film di day after ka haal
khambon se ham ne bandh ke rakha palang hai
T V pe gaay bhains pukarenge roz hi
urdu zaban se is men ziyada tarang hai
aaya hai kaisa daur siyasat men dosto
raa.i bhi ḳhush nahin hai re.aya bhi tang hai
aap apne haath ujaaḌ na len ye junun-parast
shishe ke ghar men rahte hue mashq-e-sang hai
huron pe hai nigah go marqad men paanv hain
vaa.iz aḳhir-e-umr men kya tera Dhang hai
kursi pe jab the kuchh na kiya aap ne magar
haT kar pukarna to faqat uzr-e-lang hai
vaa.iz ko mai-kade men jo dekha tha main ne kal
uḌta hua janab ke chehre ka rang hai
tanz-o-mizah men na chhuTa daman-e-adab
sab se juda ‘rahim’ tira apna rang hai
Leave a Reply