Sanjay Mishra Shauq
phir se badle yahan tahzib ne tevar apne
noch kar phenk diye jism se zevar apne
us ne shab-ḳhun jo maara to bacha kuchh bhi nahin
ham uḌate hi rahe chhat pe kabutar apne
aise zindan men hain jis men ki na divar na dar
us ne ye soch ke ḳhud kaaT liye par apne
sar-phira mujh sa koi mere muqabil bhi to ho
har kisi par nahin khulne ke hain jauhar apne
asman chhune ki ḳhvahish ne hi baḳhshi parvaz
varna halat ne to kaaT diye par apne
kis pari-ḳhana-e-gul-gasht men pahuncha huun ki ab
aa.ine men bhi Thaharte nahin paikar apne
lucknow men abhi tahzib ke tevar hain vahi
is bhikaran ne to badle nahin zevar apne
Leave a Reply