mire junun men miri vafa men ḳhulus ki jab kami milegi
chaman giraft-e-ḳhizan men hoga bahar ujḌi hui milegi
javan hai himmat hai azm-e-mohkam nazar uTha.en to ahl-e-danish
alam ke tarik ufuq pe raushan shua-e-ummid bhi milegi
tasavvur us mah-ru ka hoga kabhi to dil men ziya-ba-daman
kabhi to zulmat-kade men ham ko khuli hui chandni milegi
mira pata puchh kar na toḌo sukut mera jumud mera
buland mahlon men rahne vaalo kahan miri jhonpaḌi milegi
ye kor-chashmi ka hai tamasha ki zulmaton ki tahen jami hain
nazar se parda haTa ke dekhen yahan vahan raushni milegi
rivayati paikar-e-ghazal men bhara hai rang-e-jadid main ne
‘ziya’ mire sher men muhayya koi na.i baat hi milegi
Leave a Reply