Nawed Fidaa Sattii
kisi ne dekha nahin iltija ke lahje men
hazar phuul khile the dua ke lahje men
jo aadmi hai use aadmi milunga main
ḳhuda se baat karunga ḳhuda ke lahje men
main kohsar pe tesha-ba-dast pahuncha to
vo shakl bol uThi apsara ke lahje men
ye din dikha.e hai mujh ko miri mohabbat ne
ki mujh se baat karo tum ḳhuda ke lahje men
na-jane kaun tha kya tha magar achanak hi
vo ham-kalam hua ambiya ke lahje men
ye aur baat ki main sun nahin saka varna
diye ne kuchh to kaha tha hava ke lahje men
diye hain us ko bahut dard is zamane ne
hazar zaḳhm hain pinhan ‘fida’ ke lahje men
Leave a Reply