sab kuchh hai ayaan phir bhi hai parda mere aage
duniya hai tiri ek karishma mire aage
main pyaas ki shiddat ka falak chuum rahi huun
ghista hai jabin khaak pe dariya mire aage
main khud ko lakiron men kahin dhund hi leti
mutthi vo kabhi khol to deta mere aage
jis samt bhi dekhun hain sarabon ki saliben
phaila hai ajab ret ka sahra mere aage
tanqid miri un ke gunahon pe nahin thi
aina-e-aamal rakha tha mire aage
na-karda gunahon ki saza paai hai ‘nusrat’
insaf hua shahr men rusva mere aage
Leave a Reply