Poet
ye khub-ru na chhuri ne katar rakhte hain
nigah-e-lutf se aalam ko maar rakhte hain
charagh-e-gor na sham-e-mazar rakhte hain
bas ek ham ye dil daghdar rakhte hain
sharab-e-ishq na ai dost pijiyo hargiz
isi nashe ka ham ab tak khumar rakhte hain
miri zabani koi us se is qadar puchhe
kahin ye jhute bhi vaade shumar rakhte hain
qayamat aa chuki didar-e-haq hua sab ko
ham ab talak bhi tira intizar rakhte hain
agarche khaak barabar kiya falak ne ‘bayan’
dimagh par vahi ham khaksar rakhte hain
Leave a Reply