justuju manzil-e-idrak se vabasta hai
ḳhak-e-darvesh abhi chaak se vabasta hai
meri fitrat nahin main ghair ke raste pe chalun
meri nisbat bhi meri naak se vabasta hai
vo jo aa.i thi mire sa.in ke qadmon ke tale
meri hasti to isi ḳhaak se vabasta hai
tu kabhi ruuh se insaf nahin kar sakta
teri darveshi to poshak se vabasta hai
taḳhta-e-dar pe chaḌh ja.egi sach ki ḳhatir
ye zaban lahja-e-bebak se vabasta hai
hosh vaalo ko ye hasil nahin hoti hai miyan
ye ḳhushi dida-e-namnak se vabasta hai
ham zamin par nahin chalte kabhi tan kar ‘tariq’
dil yahan hai magar aflak se vabasta hai
Leave a Reply