Poet
is tarah aah kal ham us anjuman se nikle
fasl-e-bahar men juun bulbul chaman se nikle
aati lapat hai jaisi us zulf-e-ambarin se
kya taab hai jo vo bu mushk-e-khutan se nikle
tum ko na ek par bhi raham aah shab ko aaya
kya kya hi aah o naale apne dahan se nikle
ab hai dua ye apni har shaam har sahar ko
ya vo badan se lipte ya jaan tan se nikle
to janiyo muqarrar us ko ‘surur’ ashiq
kuchh dard ki si halat jis ke sukhan se nikle
Leave a Reply