Sauda Mohammad Rafi
gul phenke hai auron ki taraf balki samar bhi
ai khana-bar-andaz-e-chaman kuchh to idhar bhi
kya zid hai mire saath khuda jaane vagarna
kaafi hai tasalli ko miri ek nazar bhi
ai abr qasam hai tujhe rone ki hamare
tujh chashm se tapka hai kabhu lakht-e-jigar bhi
ai naala sad afsos javan marne pe tere
paaya na tanik dekhne tiin ru-e-asar bhi
kis hasti-e-mauhum pe nazan hai tu ai yaar
kuchh apne shab-o-roz ki hai tuj ko khabar bhi
tanha tire matam men nahin sham-e-siyah-posh
rahta hai sada chaak gareban-e-sahar bhi
‘sauda’ tiri fariyad se ankhon men kati raat
aai hai sahar hone ko tuk tu kahin mar bhi
Leave a Reply