ik barq-e-tapan kaunde bijli si chamke jaa.e
is ariz-e-rangin se parda jo sarak jaa.e
zahid ho to chhak jaa.e naseh ho to thak jaa.e
kam-zarf hai vo mai-kash jo pi ke bahak jaa.e
savan ki ghaTa uTThe bhadon ka saman bandhe
vo zulf jo bikhra de mahaul mahak jaa.e
kaliyon ke tabassum par tum bhi na kahin hans do
Dar hai ki rag-e-gul men kanTe na khaTak jaa.e
ai jur.at-e-rindana kuchh tu hi madad farma
ya un ka hijab uTThe ya meri jhijhak jaa.e
aa.e bhi to ho jaa.e jazb ankhon hi ankhon men
vo ashk nahin hai jo palkon se Dhalak jaa.e
kya shai hai ta.alluq bhi kya chiiz hai nisbat bhi
jab zikr tira aa.e kanTa sa khaTak jaa.e
ab sabr-o-tahammul ka ai ‘taj’ ḳhuda-hafiz
paimana labalab hai dekho na chhalak jaa.e
Leave a Reply