Saadullah Shah
ye jamal kya ye jalal kya ye uruuj kya ye zaval kya
vo jo peḌ jaḌ se ukhaḌ gaya use mausamon ka malal kya
vo jo lamha lamha bikhar gaya vo jo apni had se guzar gaya
use fikr-e-sham-o-sahar ho kya use ranjish-e-mah-o-sal kya
vo jo be-niyaz sa ho gaya vo jo ek raaz sa ho gaya
jise kuchh gharaz hi nahin rahi use dast-e-harf-e-saval kya
hua reza reza jo dil tira use joḌ joḌ ke mat dikha
vo jo apne husn men mast hai use aa.ine ka ḳhayal kya
vahi hijr raat ki baat hai vahi chand-taron ka saath hai
jo firaq se hua ashna use arzu-e-visal kya
kisi aur se karen kyuun gila hamen apne-ap se dukh mila
vo jo dard-e-dil se ho ashna use duniya-bhar ka vabal kya
vahi gard gard ghubar hai vahi charon or fishar hai
vo jo ḳhud ko bhi nahin janta vo ho mera vaqif-e-hal kya
use ‘sad’ kaisa bata.en ham use kis se ja ke mila.en ham
vo to ḳhud sarapa misal hai ye gulab kya ye ghazal kya
Leave a Reply