dil hai tumhari yaad ki duniya liye hue
main bhi huun ek husn-e-sarapa liye hue
mujh ko kiya tabah tire iltifat ne
ye raushni thi kitna andhera liye hue
vo kaash ek baar ḳhuda ko pukarte
Duube jo naḳhuda ka sahara liye hue
ai ḳhamushi guzar bhi had-e-ehtiyat se
muddat hui hai naam kisi ka liye hue
ab zindagi na kha.egi koi naya fareb
ab dil nahin kisi ki tamanna liye hue
aa.e agar bahar chaman men to ḳhush na ho
ja.egi rang-o-bu ka janaza liye hue
dil men hai bazm-e-husn bhi firdaus-e-ishq bhi
hai ik lahu ki buund bhi kya kya liye hue
kuchh aise gham-zada bhi hain duniya men ai ‘ḳhalish’
rote hain jo hansi ka sahara liye hue
Leave a Reply