Hasan Naim
raat guzri ki shab-e-vasl ka paigham mila
so ga.e ḳhvab ki banhon men jo aram mila
DhunDte rahiye shab-o-roz umidon ke qadam
kucha-e-zist men le de ke yahi kaam mila
ḳhubi-e-baḳht ki jab bhuul chuka tha sab kuchh
bevafa.i ka lab-e-ghair se ilzam mila
pa-piyada tha magar raah men vo dhuum machi
jhuk ke tazim se shahzada-e-ayyam mila
ham ne bechi nahin jis roz mata-e-ghairat
ik piyala bhi na mai ka hamen us shaam mila
muḳhtasar ye hai ki jab vaqt-e-vida-e-gul tha
ḳhvab men aa ke gale mujh se vo gulfam mila
ham junun hai ki nahin raah men puchhenge ‘na.im’
dasht-e-ghurbat men ye kya kam hai ki hamnam mila
Leave a Reply