ik sang tarash jis ne barson
hiron ki tarah sanam tarashe
aaj apne sanam-kade men tanha
majbur nidhal zakhm-khurda
din raat pada karahta hai
chehre pe ujaad zindagi ke
lamhat ki an-ginat kharashen
ankhon ke shikasta marqadon men
ruthi hui hasraton ki lashen
sanson ki thakan badan ki thandak
ehsas se kab talak lahu le
hathon men kahan sakat ki badh kar
khud-sakhta pikaran ko chhu le
ye zakhm-e-talab ye na-muradi
har but ke labon pe hai tabassum
ai tesha-ba-dast devtao!
takhliq aziim hai ki khaliq
insan javab chahta hai
Leave a Reply