Poet
ada se dekh lo jaata rahe gila dil ka
bas ik nigah pe Thahra hai faisla dil ka
sitam vo tum ne kiye bhule ham gila dil ka
hua tumhare bigaḌne se faisla dil ka
bahar aate hi kunj-e-qafas nasib hua
hazar haif ki nikla na jo sila dil ka
jo ye nishana uḌa do to samjhen tir-fagan
bahut hai navak-e-mizhgan se fasla dil ka
ilahi ḳhair ho kuchh aaj rang be-Dhab hai
Tapak raha hai ka.i din se aabla dil ka
chala hai chhoḌ ke tanha kidhar tasavvur-e-yar
shab-e-firaq men tha tujh se mashghala dil ka
vo rind huun ki mujhe hathkaḌi se bai.at hai
bala hai gesu-e-janan se silsila dil ka
phira jo kucha-e-kakul se koi puchhenge
suna hai luT gaya raste men qafila dil ka
ummid-e-sub.h men karta huun chaak daman-e-shab
junun men roz nikala hai mashghala dil ka
vo zulm karte hain ham par to log kahte hain
ḳhuda bure se na Daale mo.amla dil ka
hazar fasl-e-gul aa.e junun vo josh kahan
gaya shabab ke hamrah valvala dil ka
ḳhuda ke haath hai apna ab ai ‘qalaq’ insaf
buton se hashr men hoga muqabla dil ka
Leave a Reply