yuun bhi ik bazm-e-sada ham ne saja.i pahron
kaan bajte rahe avaz na aa.i pahron
ik tira naam tha ubhra jo fasil-e-lab par
varna sakte men rahi saari ḳhuda.i pahron
lamha-bhar ke liye barsi tiri yadon ki ghaTa
ham ne bhigi hui chilman na uTha.i pahron
vo to phir ghair tha ghairon se shikayat kya ho
nabz apni bhi mire haath na aa.i pahron
aankh jhapki to ravan thi vo hava ke ruḳh par
ham ne jo ret ki divar bana.i pahron
par sameTe hue yuun chupke se lamha guzra
shab ki dahliz pe di ham ne duha.i pahron
lauT kar aa.e na bhaTke hue raahi dil men
aag is dasht men ham ne to jala.i pahron
phir bhi le de ke vahi rog purana nikla
ham ne moḌi hai ḳhayalon ki kala.i pahron
vo hayule the ki saa.e the sar-e-raqs ‘rashid’
jism ki ek bhi jhankar na aa.i pahron
Leave a Reply